მაურიციო გუჩის ტრაგიკული ბედი
სტატიის ავტორი: დავით მაისურაძე
იტალიური მოდის სახლ გუჩის (Gucci) ისტორია ძალიან საინტერესოა და 1900 წლიდან იწყება მოდის სამყაროში Gucci ფუფუნებისა და ელეგანტურობის სიმბოლოა, თუმცა, ბრენდის ისტორია ასევე სავსეა ძალაუფლებისთვის ბრძოლით, ღალატითა და სკანდალებით. შოკისმომგვრელი და სენსაციური იყო მაურიციო გუჩის მკვლელობა, რომელიც მისი ყოფილი ცოლის – პატრიცია რეჯიანის მიერ იყო შეკვეთილი.
ვინ იყო მაურიციო გუჩი?
მაურიციო გუჩი იყო Gucci-ის დამფუძნებლის, გუჩიო გუჩის შვილიშვილი, რომელიც 1983 წლიდან ხელმძღვანელობდა ამ ბრენდს. იგი ამბიციური ბიზნესმენი იყო და ცდილობდა, რომ Gucci თანამედროვე და მომგებიანი ბრენდად ექცია. თუმცა, მისი მმართველობის პერიოდი ოჯახური შიდა დაპირისპირებებით, კონფლიქტებითა და ფინანსური კრიზისით იყო სავსე.
1985 წელს, მაურიციომ მეუღლეს უთხრა, რომ საქმიანი მივლინებით გაემგზავრებოდა, მაგრამ სინამდვილეში უკან აღარ დაბრუნებულა.
პატრიციასთვის ეს მოულოდნელი და მტკივნეული იყო, რადგან ისინი წლების განმავლობაში Gucci-ის წარმატებულ ოჯახურ იმიჯს ქმნიდნენ.
მოგვიანებით, მაურიციომ ურთიერთობა დაიწყო თავისი ბავშვობის მეგობარ – იტალიელ პაულა ფრანჩისსთან, რაც პატრიციასთვის დამატებითი შეურაცხყოფა იყო.
1993 წელს მაურიციომ საბოლოოდ მიჰყიდა Gucci-ის აქციები საინვესტიციო კომპანია Investcorp-ს, რის შედეგადაც ოჯახმა სრულად დაკარგა ბრენდის მფლობელობა.
პატრიცია რეჯიანის შურისძიება
მაურიციოს ცოლი, პატრიცია რეჯიანი, ცნობილი იყო როგორც Gucci-ის “შავი ქვრივი”. მათი ქორწინება ფუფუნებით იყო სავსე, მაგრამ ურთიერთობა ნელ-ნელა გაუარესდა. 1991 წელს ისინი განქორწინდნენ, რაც პატრიციასთვის მძიმე დარტყმა აღმოჩნდა.
განქორწინების შემდეგ, მიუხედავად მაღალი ალიმენტისა, პატრიცია უკმაყოფილო და გაბრაზებული იყო იმით, რომ მაურიციომ ბრენდი ოჯახს ხელიდან გამოაცალა.
სასამართლოს შენობაში მყოფმა გაბრაზებულმა პატრიციამ მეუღლეს უთხრა, რომ “მისთვის ჯოჯოხეთი ჯერ კიდევ წინ იყო…”
მართლაც, პატრიცია რეჯიანიმ საკუთარი დანაპირები შეასრულა და 1995 წლის 27 მარტს, დილის 8:30 საათზე, მილანში, მაურიციო გუჩი თავის ოფისში 7,65 მმ კალიბრის პისტოლეტით სასიკვდილოდ დაჭრა. მკვლელმა ადგილიდან გაქცევა მოახერხა, თუმცა მისი ყველაზე დიდი შეცდომა ის იყო, რომ იგი უამრავმა მოწმემ დაინახა და პოლიციამ იოლად მოახერხა ფოტორობოტის შედგენა.
გამოძიება ორი წლის განმავლობაში ვერ ახერხებდა დამნაშავის იდენტიფიცირებას, სანამ 1997 წელს ერთმა ინფორმატორმა მილანის პოლიციას არ გაუმხილა, რომ მკვლელობა პატრიცია რეჯიანის შეკვეთილი იყო.
სასამართლო და პატრიცია რეჯიანის განაჩენი
1998 წელს პატრიცია რეჯიანი დააპატიმრეს და 29 წლით თავისუფლების აღკვეთა მიუსაჯეს. სასამართლომ დაადგინა, რომ მან მკვლელობის ორგანიზატორს, დაახლოებით 600 მილიონი იტალიური ლირა გადაუხადა მაურიციო გუჩის მკვლელობის სანაცვლოდ.
Gucci-ის მემკვიდრეობა და სკანდალის გავლენა
მაურიციო გუჩის სიკვდილის შემდეგ, Gucci საბოლოოდ კომერციულ კომპანიად გადაიქცა. ბრენდის ოჯახურ მფლობელობას ბოლო მოეღო, მაგრამ სახელი კიდევ უფრო გაითქვა მოდის სამყაროში.
ეს ტრაგიკული ამბავი მოდის სამყაროში ერთ-ერთ ყველაზე დიდ სკანდალად დასახელდა და შთაგონების წყარო გახდა ფილმისთვის “House of Gucci” (2021), რომელშიც პატრიციას როლს ლედი გაგა ასრულებს. ფრანჩის როლს კი ფრანგი მსახიობი კამილ კოტინი.
დღეს Gucci ერთ-ერთი ყველაზე წარმატებული და ინოვაციური მოდის ბრენდია, თუმცა მის ისტორიაში მაურიციო გუჩის მკვლელობა ერთ-ერთი ყველაზე სკანდალურ და ტრაგიკულ ამბად რჩება.
