
ავტორი: გვანცა ფხალაძე
„თუ მოიძებნება ვინმე, ვინც დამიმტკიცებს, თითქოს ჭეშმარიტება ქრისტეში არაა, მე მაინც ქრისტესთან დავრჩები და არა იმ ჭეშმარიტებასთან“.
ფიოდორ დოსტოევსკი
როცა უსასრულობამ ერთი წუთით გაიდგა ფესვები, ბეთლემში დაიბადა კაცი, რომელმაც შემდგომ კაცობრიობის ისტორიული დინება სრულიად შეცვალა. ქრისტიანულ სწავლებაში იესო იყო ღმერთკაცი, უფლის მიერ მიცემული შესაძლებლობა ადამიანებისათვის – როცა მისი სისხლის წვეთი ადამის თავის ქალას შეეხო, იმ წამიდანვე გამოხსნილია კაცობრიობა ცოდვებისგან. საინტერესოა რომ იესოს აღიარებს ზოგიერთი რელიგა, თუმცა არა ღმერთად, არამედ წინასწარმეტყველად. მარიამ ღვთისმშობელი კი ერთადერთი ქალია, რომლის სახელიც ნახსენებია ყურანში (მას ერთი მთლიანი სურა აქვს მიძღვნილი) – ეს ფაქტი ბევრ რამეზე მეტყველებს.
ვინ არის ქრისტე და როგორ შეცვალა მან ეპოქა? ჩვენ გვახსოვს იესომდე და მის შემდეგ ბევრი გამორჩეული ისტორიული პირი, თუნდაც კეისრები, ჰანიბალი ან ანტიკური ეპოქის მწერლები. რატომაა იესო მათზე აღმატებული? პასუხი მარტივია – ის არ ყოფილა არც მწერალი, არც მებრძოლი, არც მთავარსარდალი ან გენერალი. ქრისტეს არ ჰქონია პოლიტიკური ან სამხედრო ძალაუფლება, მაგრამ მან უსაზღვრო სიყვარული და პატივისცემა დაიმსახურა. მსგავსი რამ ისტორიაში არ და ვერ მოიძებნება. ჩვენ დღემდე წარმოვთქვამთ ისტორიული ფიგურების სახელებს, რომელთაც უკავშირდება სხვადასხვა მნივნელოვანი ისტორიული მოვლენა, ქრისტე კი სხვაა. მან მოახერხა და შეცვალა ადამიანთა ცნობიერება, მისი სწავლებანი განსხვავდებოდა ძველი აღთქმის სწავლებისაგან. მან გადააფასა ადამიანთა მორალური ღირებულებები და ახალი გზა დაანახვა მათ. ასე მასშტაბურად ეს არც მანამდე და არც მას შემდეგ არავის გაუკეთებია, სწორედ ამიტომაა, რომ დღემდე იწერება ლექსები, პოემები, პიესები, დღემდე იღებენ ფილმებს და საუბრობენ მასზე. სწორედ ასე დაიწყო ქრისტემ ახალი ეპოქა.
არ აქვს მნიშვნელობა, რა რელიგიის წარმომადგენელი ხარ, გჯერა თუ არა ღმერთის, იმის უარყოფა, რომ იესო ნაზარეველმა შეცვალა სამყარო, თვალის განგებ დაბრმავებაა. იესო ერთადერთია ისტორიაში, რომელსაც არც ერთ ისტორიულ მოვლენას კონკრეტულად არ ვუკავშირებთ. იგი მოიცავს ყველასა და ყველაფერს სამარადისოდ.
ის არ იყო უბრალოდ ადამიანი. ის იყო ღმერთკაცი.