რა არის ლიბერალიზმი? ეს კითხვა მრავალ თანატოლს დავუსვი – ადამიანებს, რომლებიც ჩვენი ქვეყნის მომავალს ქმნიან. გამოკითხულთა უმრავლესობას სიტყვის მნიშვნელობა არ ესმის და მათი ნაწილი გარკვევის მზაობითაც არ გამოირჩევა. მათ ვერ დავადანაშაულებთ, ვინაიდან საქართველოში ლიბერალიზმის გარშემო დიდი ხანია გავრცელებულია სტიგმა, რომელიც ხალხის თვალში მას ზნეობრივი დეგრედირების განმსაზღვრელ იდეოლოგიად აქცევს. სწორედ ამიტომ, საზოგადოებისთვის მიუღებელია ყველაფერი ის, რაც დაკავშირებულია ლიბერალიზმთან ან – დასავლეთთან. მათ ურჩევნიათ, იცხოვრონ იმ იმპერიული რუსეთის კალთის ქვეშ, რომელიც  „იცავს ჩვენს რელიგიას, კულტურას და ტრადიციებს“. ასეთი სურათი გვაქვს მაშინ, როდესაც სინამდვილეში არა დასავლეთი, არამედ რუსეთი საუკუნეების განმავლობაში გმობდა და ანადგურებდა ქვეყანას. თუმცა ქართველ ერს, როგორც პოსტსაბჭოთა ხალხების უმრავლესობას, უჭირს, შეეგუოს ახალ, პროგრესულ იდეებს, რომლებიც მოქალაქეთა ცხოვრებას წარმართავენ  ამერიკის შეერთებულ შტატებსა და ევროპაში. შესაბამისად, საქართველოში მცხოვრები ადამიანები რუსეთს ჩვენი ტრადციებისა და წეს-ჩვეულებების მხსნელად სახავენ. მსგავსი თვალსაზრისით მოტივირებული საზოგადოება ხშირად ლანძღავს ლიბერალებს; მათ აღვირახსნილებსა და უკულტუროებს უწოდებენ და უპატივცემულოდ ექცევიან, მხოლოდ იმიტომ, რომ ლიბერალიზმი ინდივიდუალიზმისა და თავისუფლებისკენ გვიბიძგებს. ამ მოსაზრებების გავრცელებაში გამოირჩევა რუსული პროპაგანდა, რომელიც ხალხს, უხეშად რომ ვთქვათ, ტვინს ურევს. რუსული პროპაგანდის ერთმნიშვნელოვანი მაგალითია “ალტ ინფო“- მედიადაწესებულება, რომელიც არ მალავს საკუთარ პრორუსულობასა და ანტიდასავლურობას. ამ ორგანიზაციის წარმომადგენელნი ქრისტიანობასა და ტრადიციებს ეფარებიან, რათა თავი წეს-ჩვეულებათა დამცველ გმირებად წარმოადგინონ. მათი პროტესტი ხმაურიანია, შეკრებებზე ადიდებენ რუსეთს, ჩაგრავენ უმცირესობებს, აგინებენ დასავლეთსა და ლიბერალიზმს.